分享生活小天地

小小豬咳左都有大半個月，醫生都睇左兩次，雖然都叫做好左啲啲，不過都仍然中有幾聲咳。今次咳都幾利害，就連上幾次飲即止嘅蒜頭水(按此重溫) 都唔得。

就係依個時候，我去執開藥材鋪店員教我煲青欖桔餅湯，見都簡單易整，所以就一試啦～

材料就有瘦肉約$30、青欖$10、桔餅2個、果皮1塊、蜜棗2粒、 南北杏少許～

青欖就多數係花檔或山草藥店有售，桔餅就係藥材鋪就可以買到。

先將瘦肉汆水後撈起備用～

果皮浸軟刮囊，全部材料就先洗乾淨～

青欖要用刀背拍一拍，等可以係煲時更加出味～

煲內加入約3L水，然後加入先果皮～

待煲滾水後，就將其他材料放入再煲滾～

之後轉中火煲多大約一個半鐘小時，之後因應個人口味加鹽調味，然後就可以飲得啦～

老實講，第一啖入口總係覺得個味怪怪咁，怪嘅唔係因為難飲，只係覺甜甜地得嚟又好似咸咸地咁。不過亦都因為個味道都幾特別，飲落又覺得幾好飲，大肥豬仲一口氣飲左兩大碗，叫我有機會要再煲添呀！

亦都可能依個湯甜甜地，所以小小豬就非常鐘意飲，唔洗幾分鐘就KO左一大碗湯啦！

止咳方面效果如何呢？我俾小小豬飲左一碗半，即晚都有留意到小小豬啲咳嘅次數好似係少左啲，所以可能對小小豬都有少少效用呀！

不過，就算唔係真係有咁大幫助，平日煲下依個湯都未嘗唔係一個好選擇，因為我家兩位老細都鐘意飲嘛！

作者：小肥豬

原文連結：www.weshare.hk/kinseymama/articles/4524573

By https://hk.lifestyle.yahoo.com/%E9%9D%92%E6%AC%96%...4 則留言