分享生活小天地

一分錢一分貨，有時都唔會要求多多，但住hostel遇著以下啲咁嘅人，都咪話唔喊三聲囉！

1. 鬧鐘響不停嘅人

有一次住hostel，由其中一個同房嘅朋友（唔識嘅），鬧鐘係朝早6點幾就開始響，如果佢真係要咁早起身，我都唔介意，咁各有所需嘛！但弊就弊在佢又唔醒，個鬧鐘由6點幾響到8點半先起身！慘在我地呢啲無辜嘅人俾佢嘈醒晒…陰功！

2. 深夜講嘢大大聲嘅人

試過十一點幾瞓覺，已經訓著咗架啦，跟住有班人十二點幾返房，開始講嘢，係間房行嚟行去大大聲，結果嘈醒咗！但一山還有一山高，話說個Hostel都有少少舊，房同房之間嘅隔音麻麻哋，一點幾隔離房講西班牙文嘅朋友仲係度高談闊論緊，忍唔住都係要去同reception投訴下！

3. 飲醉酒嘅人

飲酒飲到醉醺醺，成身酒味仲要深宵嘈嘈閉嘅人。本人最怕就係遇到飲醉酒嘅人，佢都飲醉酒，你講乜佢都聽唔入耳，話佢佢都會繼續嘈，仲要第二日乜都唔記得晒自己做咗啲咩！真係有時都唔知點對付呢啲人！

4. 做兒童不宜嘢嘅人（唔係吸煙同飲酒）

即係住係一個mixed dorm，明明就係有好多陌生人，有男有女，但就偏偏要係咁多人嘅地方做一啲兒童不宜嘅嘢，發出一啲「奇怪」嘅聲音！可能佢哋覺得好刺激，但聽到啲咁嘅聲音嘅人就真係瞓得有啲唔係好安樂！

5. 話對你有興趣嘅人

即係傾咗一陣計，跟住就開始話覺得你好靚，對你好有興趣嘅人，如果佢仲要同你同一間房，都咪話唔驚。試過同個朋友一齊去旅行，佢就係個受害者，最後明明一人俾咗一張牀嘅錢都要嗰晚一齊孖鋪！

By https://traveltillidrop.wordpress.com/2014/04/06/5...